బొజ్జతో పాటు పెరుగుతున్న కేన్సర్‌ ముప్పు

పెరిగిపోతున్న బొజ్జతో కేన్సర్‌ ముప్పు కూడా పెరుగుతోందని ప్రపంచ ఆరోగ్య సంస్థ(డబ్ల్యూహెచ్‌వో) అధ్యయనం హెచ్చరించింది. ఇందులో ప్రేగు, రొమ్ము కేన్సర్లతో పాటు పాంక్రియాటిక్‌ కేన్సర్‌ వచ్చే ప్రమాదం ఎక్కువన్నారు. బీఎంఐ లానే పొట్ట, నడుము కొలతలు కూడా కేన్సర్‌ ముప్పును అంచనా వేయడానికి బాగా తోడ్పడతాయని అంతర్జాతీయ పరిశోధకులు వివరించారు. పొట్ట 11 సెంటీమీటర్లు పెరిగితే స్థూలకాయానికి సంబంధించిన కేన్సర్ల ముప్పు 13 శాతం పెరుగుతోందని వివరించారు.

ముఖ్యంగా బొజ్జ 8 సెంటీమీటర్లు పెరిగితే ప్రేగు కేన్సర్‌ వచ్చే ముప్పు 15 శాతం పెరుగుతోందన్నారు. ఓ అధ్యయనం ప్రకారం.. కేన్సర్‌ రావడానికి కారణమయ్యే అంశాలలో పొగ త్రాగే అలవాటు తర్వాతి స్థానం స్థూలకాయానిదేనట! బరువును నియంత్రించుకోవడం ద్వారా ఈ ముప్పును తగ్గించుకోవచ్చని శాస్త్రవేత్తలు తెలిపారు. అధిక బరువుతో లైంగిక హర్మోన్ల స్థాయుల్లో మార్పులు చోటుచేసుకొని, కేన్సర్‌ ముప్పును పెంచుతున్నాయన్నారు.