ప్రోస్టేట్ కేన్సర్ అంత డేంజరా..?

వ్యాధి నిర్ధారణ జరిగి 6 ఏళ్లు. వ్యాధి ముదిరి మంచం పట్టి సరిగ్గా 40 రోజులే! అయినా మెరుగైన చికిత్సలన్నీ చిటికెలో పొందే వీలున్న ఓ ప్రజా ప్రతినిధి ఇటీవలే ప్రోస్టేట్‌ కేన్సర్‌ చేతిలో ఓడిపోయారు. మరి, అన్ని వసతులు లేని సాధారణ వ్యక్తుల పరిస్థితేంటి? ప్రోస్టేట్‌ కేన్సర్‌ పట్ల అందర్లో ఇలాంటి భయాలెన్నో! అయుతే నిజంగానే ఈ వ్యాధి అంత ప్రాణాంతకమైనదా?

ప్రోస్టేట్‌ కేన్సర్‌ అన్ని కేన్సర్‌లలాంటిదే! కాకపోతే లక్షణాలను తీవ్రంగా పరిగణించకపోవడం వల్ల దశలు దాటేసి, మూడు, నాలుగు దశల్లో వైద్యులను కలుస్తూ ఉండడం వల్ల ప్రాణాంతక కేన్సర్‌గా పేరు తెచ్చుకుంది. కానీ తొలి దశలోనే గుర్తించి అప్రమత్తమైతే అన్ని కేన్సర్‌లలాగే దీన్ని కూడా సమూలంగా నయం చేసే వీలుంటుంది. పురుషుల్లో మూత్రాశయం దగ్గర వాల్‌నట్‌ ఆకారంలో ఉండే ఈ ప్రోస్టేట్‌ గ్రంథిలో కేన్సర్‌ పుడుతుంది. కొన్ని కేన్సర్లు ప్రోస్టేట్‌ వరకే పరిమితమై అత్యంత నెమ్మదిగా పెరిగితే మరికొన్ని వేగంగా పెరుగుతూ ప్రోస్టేట్‌ దాటి ఇతర అవయవాలకూ వ్యాపిస్తాయి. లింఫ్‌ గ్రంథులు, ఎముకల్లోకి పాకిన ప్రోస్టేట్‌ కేన్సర్‌ను నయం
చేయడం కొంత కష్టం. అయితే ప్రోస్టేట్‌ వరకే పరిమితమై ఉండి ప్రారంభంలోనే గుర్తించగలిగితే సమర్థమైన చికిత్సతో ఈ కేన్సర్‌ను తేలికగానే నయం చేయొచ్చు.

ఓ కన్నేసి ఉంచండి!
లక్షణాలను పసిగట్టి వెంటనే వైద్యులను కలవడం వల్ల వ్యాధి అదుపులోకొస్తోంది. కానీ మన దేశంలో వ్యాధి ముదిరిపోయిన తర్వాత మూడు లేదా నాల్గవ దశలో వైద్యులను కలవడం వల్ల అప్పటికే కేన్సర్‌ ఇతర శరీర భాగాలకు పాకిపోయి చికిత్సకు లొంగకుండా తయారవుతోంది. కాబట్టి ప్రోస్టేట్‌ కేన్సర్‌ను ఎంత త్వరగా గుర్తిస్తే అంత త్వరగా నయం చేయవచ్చు. ఇందుకోసం 40 ఏళ్లు దాటిన ప్రతి పురుషుడూ లక్షణాల మీద ఓ కన్నేసి ఉంచాలి. అవేంటంటే...

-తరచుగా మూత్ర విసర్జన చేయాలనిపించడం
-మూత్రం చుక్కలుగా రావడం, మూత్రాశయం ఖాళీ కాకపోవడం
-నడుము భాగంలో ఇబ్బంది, నొప్పి
-మూత్రంలో రక్తం
-ఎముకల నొప్పులు
-పురుషాంగం గట్టిపడకపోవడం