పట్టణాల్లోని మహిళలకే కేన్సర్ ముప్పు

కేన్సర్ వ్యాధి ప్రాణాంతకమైందని తరచూ వింటాం. అయితే ఈ వ్యాధి నుంచి కాపాడుకోవడానికి అవకాశాలు చాలా ఉన్నాయి. ఆ అవకాశాలపై సరైన అవగాహన ఉంటే కేన్సర్ భయం లేకుండా హాయిగా జీవించొచ్చు. కేన్సర్ వ్యాధి తొలిదశలో కనిపించే లక్షణాలకు సంబంధించిన పరిజ్ఞానం, ఆ లక్షణాలు కనిపించిన తరువాత తీసుకోవాల్సిన ముందు జాగ్రత్తలు, చికిత్సల గురించి చాలా మందికి తెలియదు. కేన్సర్ లక్షణాలను పసిగట్ట లేక అవేవో ఇతర వ్యాధి లక్షణాలుగా భావించడంతో ప్రాణం మీదకొస్తుంది.
         

కేన్సర్ అనేది ఒక వ్యాధి కాదు. ఇది సోకిందని తెలిసే నాటికే దాని తీవ్రత పెరిగి ఉండడం కేన్సర్ వ్యాధికి ఉన్న ప్రధాన లక్షణం. శరీరంలోని ట్రిగ్గర్ కణాలు కణవిభజనపై నియంత్రణ కోల్పోవడంతో కేన్సర్ ప్రారంభమవుతుంది. సంబంధిత పరీక్షల ఆధారంగా వ్యాధి ఉందని, అవయవం ఆధారంగా రకాన్ని తెలుసుకొని సరైన చికిత్స అందిస్తే కేన్సర్‌ను అరికట్టొచ్చని వైద్య నిపుణులు అంటున్నారు. కేన్సర్ అనేది అనేక వ్యాధుల సముదాయం. వాటన్నింటికి ఒకే సాధరణ లక్షణాలుంటాయి. శరీరంలోని ఏ భాగం నుంచి కేన్సర్ వచ్చిందో దాని ఆధారంగా వైద్యులు కేన్సర్ రకాన్ని నిర్ధారిస్తారు.