విటమిన్ డీతో బ్రెస్ట్ కేన్సర్ కు సంబంధం

మహిళలను ఎక్కువగా బలి తీసుకుంటున్న వ్యాధుల్లో బ్రెస్ట్ కేన్సర్ ముందు వరుసలో ఉంటుంది. ఈ వ్యాధిని ఆరంభ దశలో గుర్తిస్తే సులువుగా అరికట్టొచ్చు. కానీ నిర్ధారణ ఆలస్యమైతే మాత్రం ఈ మహమ్మారి చికిత్సకు లొంగదు. రొమ్ము కేన్సర్‌ రిస్క్ బారిన పడకుండా ఉండటానికి విటమిన్-డిని ఎక్కువగా తీసుకుంటే ఫలితం ఉంటుందని తాజా అధ్యయనంలో తేలింది. కాలిఫోర్నియాలోని శాన్ డియిగో స్కూల్ ఆఫ్ మెడిసిన్ పరిశోధలో ఈ విషయం వెల్లడైంది.

ఇందుకోసం 55 ఏళ్ల పైబడిన 3323 మంది మహిళలను 2002 నుంచి 2017 మధ్య నిశితంగా పరిశీలించారు. రక్తంలోని ప్లాస్మాలో 25(OH)D గా పిలిచే సీరం 25-హైడ్రాక్సీ విటమిన్ డి మోతాదు మిల్లీ లీటర్‌కు 60 నానో గ్రాములు ఉన్నవారిలో బ్రెస్ట్ కేన్సర్ వచ్చే ముప్పు తక్కువగా ఉన్నట్టు గుర్తించారు. సాధారణంగా ప్లాస్మాలో 25(OH)D మోతాదు 20 ng/ml ఉంటే ఆరోగ్యకరమని పరిశోధకులు చెబుతారు. కానీ వారితో పోలిస్తే 25(OH)D మోతాదు 60 ng/ml ఉన్నవారిలో రొమ్ము కేన్సర్ బారిన పడే ముప్పు ఐదో వంతు మాత్రమేనని గుర్తించారు. సీరం విటమిన్ డి మోతాదు పెరిగే కొద్దీ కేన్సర్ ముప్పు తగ్గుందని ఈ పరిశోధనలో వెల్లడైంది.

అయితే ఈ పరిశోధనలో భాగమైన వాళ్లంతా శ్వేత జాతి మహిళలు మాత్రమే. ఆసియా, ఆఫ్రికా తదితర దేశాల మహిళలపై ఇది ఎలాంటి ప్రభావం చూపుతుందో ఇంకా తేలాల్సి ఉంది. అంతేగాకుండా.. ఈ పరిశోధనలు మెనోపాజ్ దశ దాటిన వారిపైన చేసినవేనని పరిశోధకులు తెలిపారు.